L'estiu es pontannada benesida per lo monde que vòu parlar la lenga de son país mai que, dau jorn a la jornada, troba degun per va faire. Tre lo començament de julhet aqueu monde an poscut anar a Nimes, onte se debanava l'Universitat Occitana d'Estiu : tres a quatre jorns e vespradas a parlar en lenga nòstra de tèma ecologicas o artisticas e a escotar recitaus e concerts en occitan. Lei 18-19 de julhet, èra au Baucet, dins Var, que 'Lo festivau Espigoule' prepausèt concerts d'artistas locaux, de rescòntres sus lo patrimoni, e en particular la conferéncia de Gerard Tautil sus la toponimia locala a 15 h sala dau Cèucle Republican. Mai tot es pas acabat e podretz encara vos marcar per lei Rescòntres Occitans de Provença, que elei se debanaràn a Sant-Leugier dau Champsaur... ideau per escapar a la taforassa, qué ! Coma d'acostuma la tòca n'en sarà de gropes tematics sus lo patrimoni montanhard, la dança, l'aprendissatge de la lenga, la coneissénça dau patrimoni literari, la botanica e lo mitan naturau en montanha, lo cant corau, e charadissas, penequets, balètis, ciné lei vespres. Chasque an lei rescòntres se fan despuei... benlèu que l'avèm oblidat tant son ancians. En veritat en 1978 ja se fasián en montanha de Lura, puei dins de luecs variats de montanha, a l'iniciativa d'una chorma d'afogats amé sa capolièra Ana-Maria Poggio. Ailàs aquela dòna a defuntat de la Covid en 2022... per astre sa còla a vòugut relevar e, despuei 2023 se fai encara. Per vos i marcar, facile, auretz ren que d'escriure a ieopaca@ieo-oc.org per demandar lei condiciens, o a agachar l'imatge.